الجواب بعون الملك الوهاب
واضح رہے کہ خرید و فروخت کا معاملہ کرتے وقت ایسی شرط لگانا جس شرط کا یہ عقد نہ تقاضا کرتا ہو اور نہ ہی یہ شرط اس معاملہ کے مناسبات میں سے ہو، اور اس شرط میں بیچنے والے یا خریدنے والے کا کوئی فائدہ ہو (یا مبیع کا فائدہ ہو، بشرطیکہ مبیع اس کا اہل ہو، مثلاً: غلام ہو) تو یہ شرط خرید و فروخت کے معاملہ کو فاسد کردیتی ہے۔ شرعی اعتبار سے شرطِ فاسد کی صورت میں فروخت کنندہ اور خریدار کے لیے حکم یہ ہے کہ اس معاملہ کو ختم کرکے نئے سرے سے معاملہ کریں۔ شرطِ فاسد کی موجودگی میں مشتری کے لیے مبیع سے استفادہ جائز نہیں ہوتا، فقہاءِ کرام نے بیوعِ فاسدہ کو سود کے حکم میں شامل کیا ہے۔
شروطِ فاسدہ کی بنا پر شریعت نے جب بیع کو فاسد قرار دیا ہے تو اس میں عاقدین کی رضا وعدم رضا کا اعتبار نہیں، بلکہ اس عقد میں موجود اس خرابی (شرطِ فاسد) کو جب تک دور نہ کیا جائے، اس وقت تک شریعت کی نگاہ میں وہ بیع درست نہیں ہے، ایسی بیع کو ختم کرکے شرطِ فاسد کے بغیر بیع کرنا لازم ہے۔
صورتِ مسئولہ میں بیع کے وقت فریقین کے درمیان طے پانے والی درج ذیل دونوں شرائط، شرطِ فاسد کے حکم میں داخل ہیں:
اول: یہ شرط کہ اگر مشتری بکر نے سودا کینسل کیا تو اس کا ادا کردہ ایڈوانس واپس نہیں ملے گا، اور اگر بائع زید نے سودا کینسل کیا تو وہ بکر کو ادا شدہ کل ایڈوانس رقم کا ڈبل فراہم کرے گا۔ یہ شرط عقدِ بیع کا تقاضا نہیں کرتی اور اس میں بلاعوض مالی نفع مقرر کیا گیا ہے، اس لیے یہ شرطِ فاسد ہے۔
دوم: یہ شرط کہ مکان کا سیکنڈ فلور دسمبر تک زید ہی کے استعمال میں رہے گا، اور فرسٹ فلور جو کرایے پر چڑھا ہوا ہے، اس کا کرایہ فی الحال زید ہی وصول کرے گا اور اپنے استعمال میں لائے گا، اکتوبر سے اس فلور کا کرایہ بکر کو لینے کا اختیار ہوگا۔ یہ شرط بھی بائع کے لیے ایسا نفع مقرر کرتی ہے جو عقدِ بیع کا مقتضیٰ نہیں، اس لیے یہ بھی شرطِ فاسد ہے۔