کیا فرماتے ہیں علماءِ کرام اس مسئلے کے بارے میں کہ: میں Yeylo نامی ایک آن لائن سروس کے متعلق شرعی رہنمائی حاصل کرنا چاہتا ہوں، جو JazzCash کے ذریعے خریداری کے لیے مالی سہولت فراہم کرتی ہے۔ اس طریقۂ کار میں صارف کسی شریک دکاندار سے سامان خریدتا ہے اور Yeylo کے ذریعے اس کی ادائیگی اقساط میں کرتا ہے۔ کمپنی اس سہولت کو قرض پر مبنی پروڈکٹ قرار دیتی ہے اور صارف سے خریداری کی اصل رقم کے علاوہ کل خریداری کی رقم کا 15 فیصد بطور سروس فیس وصول کرتی ہے۔ مثلاً اگر سامان کی اصل قیمت 5,000 روپے ہو تو 750 روپے سروس فیس شامل کرکے صارف کے ذمہ مجموعی طور پر 5,750 روپے لازم ہوتے ہیں، جو مقررہ اقساط میں ادا کیے جاتے ہیں۔
اسی طرح اگر صارف مقررہ وقت پر قسط ادا نہ کرے تو واجب الادا قسط کی اصل رقم پر 10 فیصد بطور تاخیر فیس مزید وصول کیا جاتا ہے۔ بعض اوقات Yeylo کی طرف سے 50 فیصد کیش بیک کی پیشکش بھی کی جاتی ہے، جس کے نتیجے میں صارف کو ادا کی گئی رقم کا ایک حصہ واپس مل جاتا ہے اور بعض صورتوں میں کیش بیک کے بعد سامان کی حقیقی لاگت اس کی اصل قیمت سے بھی کم رہ جاتی ہے۔
مذکورہ صورت میں شرعاً Yeylo کے ذریعے خریداری کرنا اور اقساط میں ادائیگی کرنا جائز ہے یا نہیں؟ نیز خریداری کی رقم پر 15 فیصد سروس فیس، تاخیر کی صورت میں 10 فیصد اضافی فیس اور کمپنی کی طرف سے ملنے والے کیش بیک کا شرعی حکم کیا ہے؟